غفلة الساقي

يا مِشغل الحزن بعيون الشقي خلّه=حذرك تعكّر مزاج الدمع بحداقي
عهدٍ عقدته معه لا ترجع تحلّه=دام الشقى والمواجع وأنت عشّاقي
كثر العنا والسهر ياملتهي من لّه=يوم أشتعل لك قصايد تحرق أوراقي
عاث الحزن واستباح الجوف واحتلّه=لنّك عطيته وعد يستوطن أعماقي!
أبطيت أنا أجمع غزير الدمع وَاهلّه=وأروي عروق ٍ تموت بغفلة الساقي
عمري دفعته ثمن ياهاجري كلّه=وأنا أنتظر غيث يطفي لاهب أشواقي
كم من طريق ٍ يملّ خِطاي ماملّه=كم أنثنت من مشاوير التعب ساقي
بغيت أسافر معك للغيم وَاوصلّه=وأعلنت قبل أبتدي مشوارك أخفاقي
تدري وش اللي يعلّ القلب ويذلّه=لي جيت أعانق حبيب ويرفض عناقي!
رح يالسؤال العتيق لصاحبك قلّه=قلّه كفاني قديم الجرح وش باقي