فلاش

كنت في مناسبة.. وجاني واحد وجلس جنبي... وقال ياخي سألت عنك وقالوا هذا شغال في المكافحة.. ودي أصارحك.. أنا عندي ولد ومطلع روحي.. كل يوم مهاوش أنا وياه.. ولا ودي أشد عليه وهو ماهو معطيني وجه... وحاطن ربعه من دوني.. ونا ماقصرت معه بشيء.
شريت له سيارة.. وعطيته فلوس.. وتوسطت له بوظيفته.. وخطبت له.. وإلى يومك النفس شينة والتعامل "زفت" وياليتها عليّ.. هالحين أمه وخوانه يشتكون منه.. وتصلت على العمل حقه أسألهم عنه.. وقالولي يداوم يوم ويغيب يومين.. وانصح ولدك لا يفصل.. وأمه تقول ما يجي إلا آخر الليل ومعه ريحه تقلب الكبد.
وأنا متأكد انه يتعاطى.. بس قلي وش الحل.. والله ما ودي بالفشيلة.. قلتله الحل بسيط وسهل.. اتصل على مكافحة المخدرات ويأخذونه بستر لمستشفى الأمل لو كان بقرية وإلا هجره.. وزود على هذا ينقلون اللي مثله على حسابهم لين يوصلونه المستشفى لا من شاف ولا من دري.. ولا تردد وألحق المشكلة قبل تكبر.. ترى المخدرات تسوي البلاوي.. ويا الله سترك..
الأبرق