خيل الرضى

نامت عيون الدالهين يا عين وينك والمنام
وراك لازمك السهر ما انتي بمثل الدالهين
نامي ترى الحيل أنقضي والصدر شققه الهيام
ولا عاد باقي بخاطري إلا شوي وتدمعين
لا يا وجودي من بعد ما راح وانساك المنام
وجد الذي ماتوا هله بعد العصر وأمسى حزين
البارحه معهم سهر واليوم ما يلقى كلام
بالبيت يدعي ليتني يا ليتني معهم دفين
من الصاله لبيبان الغرف يبكي ويصرخ يا حزام
غبتوا وانا مالي حياة بدونكم يا غايبين
من الناس ما حوله أحد وأقاربه من كم عام
أبوه قاتل بالغلط واقفى مع أمه نازحين
ما يدري عنهم وينهم لو أنتوى عقد السلام
غريب واللي أدهى وآمر أمسى يتيم الوالدين
على الذي لامن طرى لخليف والعالم نيام
كن الغطى فوق الجسد قضبان والعاشق سجين
يا هوه يا للي غيابه يا هوه وغيابك حرام
لد النظر بالمسألة وخافي الله حنا مسلمين
معروف من يبدأ الخطأ يرجع وينهي للخصام
لكن بديتي بالخطأ ورحتي وظنيتك تجين
تدرين وشك كثر الغلافي عيني عن كل الأنام
ولو أنتي ما انتي بداريه ما اخطيتي ومعها تزعلين
ولو الخطأ بالمرجلة وفي حد ما يقبل كلام
ما سقت لك خيل الرضى لو مهما لجلي تفعلين
يا الغالية يا الغايبة عن خافقن بك مستهام
ما عاد لك عذرن ابد عليَّ يردك تبعدين
انتي ترى كل دنيتي والحظ لا من قام قام
قومي معه ولا معك بيجلس إذا أنتي بتجلسين
القلب قطعة واحدة ولا يقبل القلب انقسام
وانتي لحالك ساكنة وضلوعي من دونك حصين
بالعين مالا آصفه بالمختصر قمة غرام
يعني ما ينفع وبصراحة غير قدمي تجلسين
يا عين وينك والعرب ناموا ولا حولك منام
جبت الذي في خاطري وباقي شوي وتدمعين