الحر الأشقر أصيل وشبحه بعيدي ينومس اللي قناه ويجلي أحزانه

الصقر لو فك الجناحين صادي
يصيد بالصحرا وبارض الجبالي
يطير من فوق القمم والوهادي
يهجم على صيده ولا هو يبالي
له قدر عند اليعربي ليس عادي
نجدد التقدير ما صار بالي
محمد عبدالله الشهري - مكة المكرمة
الصقر عينٍ ثم مخلب وجنحان
وسرعة انقضاض قصوى رهيبه
صورةٍ تجمع صفات لها شان
مطمع الصقَّار أو حبٍ عجيبه
يدفع به الصقار جزلات الاثمان
كم خرب غَدَّاه وبالمخلب يجيبه
سعود عائش الحربي - جدة
الصقر مهوي وعينه تسبر الصيدي
من عالي الجو مرس فل جنحانه
الحر الأشقر اصيل وشبحه بعيدي
ينومس اللي قناه ويجلي أحزانه
طير الهدد غالي ف السوق ويزيدي
ربّي حباه الذكا والعزّ سبحانه
حمد عبدالله الوايلي - حوطة سدير
عين الصقِر من بعيد تْشوف صيداته
سبحان من صوّره وابدع بتتميمه
منقاره المنعقف إحدى علاماته
إنّه بعيدٍ عن الآكلْ بتحريمه
خلّه يصيد الطيور بْوقت هدّاته
ويعشّي الناس والمفروض تكريمه
محمد مقحم المقحم - الرياض
نرحب بمشاركاتكم الشِّعرية، وما تلتقطه عدساتكم
من الصور الهادفة والطريفة على إيميل الخزامى:
rb-khozama@alriyadh.com
صورة العدد مرسلة من سليمان السنيدي