احذر لسانك

احذر عدوّك بالمجالس: لسانك!
يا كمّ فرّق بين خلٍّ وخلّه!
صونه يصونك.. وانت اذا خنت خانك
هذا مثل مضروب في كلّ ملّه
حذراك وسط الناس تطلق عنانك
بعض العرب هرج القفا شغلةٍ له
خايف عليك الضيم.. خايف هوانك
تعيش مهمومٍ.. والاسباب زلّه!
ما ينفعَك «سجعك» ف غيبة «بيانك»
صوغ «المعاني».. وافهم الهرج كلّه
ولا تطلع المرجوج عن كلّ شانك
سرّك مع المرجوج سيفٍ يسلّه
تراك ما ترتاح لو شخص هانك
وترى الدوا ما يْفيد في كلّ علّه
لا تْقول غير الحقّ.. ف الحقّ امانك
وأوجز.. كثير الحكي كلٍّ يملّه
وإن زان لك يا صاح صافي زمانك
نفسك تغرّك يومها مسفهلّه
اسعَد.. ولا تبعِد تضيّع مكانك
تلقى السعد حلّت بلاوي محلّه
ترى الزمن داير.. ولو يوم زانك
يا سرعها شمس.. وْيا سرع الأهلّه!!
فيصل الصاعدي