يا سيّدي هبّت وثوَّر لها غبار لاشك خشم العان باقي محلّه وسودة تهامة طلها فوق الأزهار وعلى الشمال أمطار وسمٍ تعلّه كان العجاج ينقص الشمس مقدار مقدار دارك ما نقص يوم والله واللي جمعهم مسلمين وكفار في حربنا صفٍ وذي حكمةٍ له ما غيروا في قلوبنا خمسة أعشار من الوفا والحب والصّدق كلّه من فيه خيرٍ ما يدوّر ف الأشرار أهل وسكن ويجيبهم فزعةٍ له على هله وأرضه وعرضه ولو جار عليه أخوه وشاف ضيمٍ وخلّه لي ملةٍ ما تعرف ظروف وأعذار ترى العذر عن ملّة الحق ملّه ومانيب الوم اللي على داره يغار الله يثيبه والوطن غايةٍ له العار من يجلب على أرضه العار كشاف عوراته على الناس خلّه يا سيدي حنا هل الحق واكثار ولاّ هل الباطل أبشّرك قلّه غاراتهم تذكر بشاشات الأخبار وغاراتنا نحمي وطنا ونجلّه نعرف فضل من وحدونا والأخيار من أهلنا اللي ذِبّحَوْ فدوةٍ له أقطار كنا ويا ترى وش ه الأقطار كل نخلتينٍ دولةٍ مستقلّه فقرٍ وجوع وخوف ما يامن الجار جاره ولا يعطف على الخلّ خلّه ثلاثة قرونٍ ولا مرت اقصار يطوي الوطن سيفٍ وسيفٍ يفلّه لين انتهت يا سيدي خير وإعمار والمملكه في أمنها مسفهلّه من اليمن للشام لو كوكبٍ سار فيها وحيدٍ دور اللي يدلّه الفعل يشفي غلّ وافين الأشبار والا الردي يشفي من الحكي غلّه فينا عيوب ومن بلا عيوب ما صار من فيهم الكامل ترى الكامل الله وفينا مزايا شعشعت مثل الانوار مشاعلٍ في الليل شهب وأهلّه ما تنجحد لا شك في الخلق فجّار ما يقبلون الحق دقه وجلّه ومجادل الحاقد مثل لعبة قمار ما هي حرام وبس.. خسر ومذلّه يا سيدي وانته لنا ستر وجدار وانت الذي نبني ونزرع بظلّه وانت الحليم وسيّد العرب الأحرار وما صعب من أمرٍ علينا تحلّه وان عجعجت يا سيدي كلّها غبار يمضي وخشم العان باقي محلّه بدر بن عبدالمحسن بن عبدالعزيز
