يوم الإمام أسس وقاد المسيرة

(يوم بدينا).. شعبها وهي لنا دار
يوم الإمام أسس وقاد المسيره
تاريخ نفخر به ويا حي الاسفار
في مجدها الماضي ويا حي سيره
من يومها والدار تشوق الانظار
ويا حيها من بدة الكون ديره
عروس .. والدنيا لها طقت الطار
وكل تمنى بالبسيطه مصيره
من يومها .. كل ارض قالت للاقدار
نبي مثل مجده .. ولا فيه غيره
لان السعود اللي ولوها بالاصرار
هم من بناها في يقين و بصيره
عدى ثلاث قرون و بكل الادوار
من مقرن هم عزوته والذخيره
ل سلمان واخوانه طويلين الاشبار
و محمد .. الباني صروح كبيره
اللي ولوها ثم حموها من العار
و نار الفتن اطفوا لهايب سعيره
عقب المحل خلوا لها القاع نوار
و عقب العوز من فعلهم زاد خيره
ثنوا لها .. ما رددوا عندها اعذار
بحزم يسد الباب عن أي حيره
يا الله عساهم من طويلين الاعمار
و اعماركم يا اللي بغضتوا قصيره
و آن زودوا يا دار في مجدك انكار
هذي مزية .. والمزايا كثيره :
اللي حكم منك ولا يوم بك جار
الاجنبي .. يوم ان غيرك يديره