الحل قلته بالبيوت الاديبه.. بصمة ابهامك ياطليق الحجاجين

كتب لغز الأسبوع الشاعر علي مونس الجدي من الرياض والذي يقول:
انشدك عن بنت وربي عجيبه
وخواتها ياكثرهم بالملايين
مابينهن اشباه قصه غريبه
مع الرجال تشاف وايضا المزايين
فيهن اهميه اذا جت مصيبه
يالله سترك يوم طرح الموازين
وكانت الرمعات الصحيحة من الشعراء:
حييت ياراع العلوم العجيبه
ياشاعر له بصمة بالدوواوين
الحل قلته بالبيوت الاديبه
بصمة ابهامك ياطليق الحجاجين
خالد إبراهيم المرشود - الرياض
يا مرحبا و الحل لازم نجيبه
الحل بصمة دون شك وتخمين
سبحان من سواه حاجه غريبه
تبين المطلوب و الخافي يبين
محمد بن عبدالرحمن أبو دحيم - البدائع
يارب ياللي كلنا نهتدي به
ياخاق بن ادم من الروح والطين
ياخالق البصمه وسامع دبيبه
نعوذ بك من شر كل الشياطين
حجي عايد المفضلي - الرياض
يالجدي حل اللغز بصْمَه عجيبه
ولغزك ذهب عِيار اربع وعشرين
هو معجزه مِن معجزاتٍ رهيبه
فيها عِبَر للي يعرف القوانين
صفحة خزامى مِع رجالٍ حبيبه
ياجعل توفيقه لهم قولوا آمين
سعود عائش الحربي - جدة
ياعلي لغزك لا بغينا نجيبه
ياصلك حله يالسنافي ببيتين
لو الاصابع من بعضها قريبة
بصماتها ما تتفق بين الاثنين
علي الرشيد - رياض الخبراء
ياللي طرحت اللغز لغزك نجيبه
أبشاية الله كل خافي يبا يبين
حله هو البصمه ولا فيه ريبه
واضح ولا يحتاج شرح وبراهين
سعود بن ثواب سليم المطيري
لغز الأسبوع
كتب لغز الأسبوع الشاعر علي نافل الحربي
من الرياض ويقول:
نشدك عن شيٍ عليه نتغذا
اللي وراه ايشاف وعندك ولا يشاف
شكلٍ نبيه وشكل منه نتوذا
شكلٍ غذا وشكلٍ يجي سمٍ ذعاف
نستقبل الرمعات والحلول خلال أربعة أيام
من نشر اللغز على الإيميل:
rb-khozama@alriyadh.com