دوّرت في عيونه من يسار ويمين لقيتها دانه بعنق الحسنوات

اللغز السابق كتبه للصفحة الشاعر أحمد بن ناصر المحرج من الرياض والذي يقول:
ابنشد اللي فاهم ودايم فطين
اللي يصيد الغازي لوهن خافيات
ياويش بنت ببطن بنت من سنين
وثنتينهن في وسط عود ساكنات
يازينها ذا البنت عند الناظرين
ياما هووها في سنين ماضيات
باسبابها ماتو رجال صامدين
صاروا مع الايام ضمن الذكريات
وهاكم حلول اللغز والرمعات الصحيحة من الشعراء:
لغزاً من المحرج ويبغى الرامعين
اللي لهم رمعات مافيها شتات
دوّرت في عيونه من يسار ويمين
لقيتها دانه بعنق الحسنوات
لجله يغوص الماهرين الاولين
بحثً عن المحار في عزم وثبات
مقرن بن متعب الهرف - الرياض
يا مرحبا يا صاحب القلب الرزين
ياللي حبكت اللغز من كل الجهات
الحل درة قدرها قد ر ثمين
ما توجد الا بالبحور الَمظلمات
علي الرشيد - رياض الخبراء
اللغز واضح ياعرب للفاهمين
يلقونها اهل الغوص وسط المبهمات
كل يبي حظه يقوم ويستعين
ويفوز بالدانه ويارب الحياة
صالح البشري - الرياض
يامرحبا ترحيبة بالرامعين
وبشاعرٍ صاغ اللغز ويقول هات
اللولوة فصدافها صيد ثمين
والبحر هايج نطلب الله الثبات
محمد بن صالح الحربي - الرياض
أبو ناصر حابك لغز ثمين
وما كل غواص ظفر بالغاليات
والدر طلابه يجي رجل ذهين
والا غدى طعم لهوام الهايمات
عبدالرحمن بن فهد السويس - الرياض
انا اشهد ان اللغز من عيار ثمين
جودت لغزه والرموز الغايبات
الحل دانه بالبحر يالله تعين
اللي يغوصون البحر بالمظلمات
خليف فهيد الحربي - الرياض
ادري بأن اللغز مرده يبين
له ننتظر اسبوع وايام مقبلات
واللولوه حله وانا عندي يقين
في غبة الابحار يارب النجاة
عبدالله الفهيد العنزي - الرياض
لغز الأسبوع
كتبه للصفحة الشاعر غالب الجنيدي من رفحاء ويقول:
انشدك ياللي تفهم روز الالغاز
عن شايب في راس بنت جميله
البنت تعرف بالجزيره والاهواز
وسط المجالس ماتعرف الفشيله
ترقص مع اللي لا مشى كود عكاز
ويرقص معاها العود يومي شليله
نستقبل الرمعات والحلول خلال أربعة أيام من نشر اللغز على الإيميل:
rb-khozama@alriyadh.com