تأسيس دار المجد والعز والخير

بقيادة اللي كل جيشه قرومي
إمامنا ياما حمانا من الغير
صان البلد كله وصد الخصومي
خلا البشر تارد على جمة البير
متكاتفه والخوف صار امعدومي
ساد الأمن من فضل وال المقادير
وحل السعد من بعد كثر الهمومي
محمد بن سعود حِكْمه وتفكير
شيخٍ على الظالم قويّ العزومي
قايد ومن حوله رجالٍ مغاوير
هدات حرٍ ما يهاب الخصومي
حل الأمن والقوم ما صارت اتغير
الشر ولاّ والسعد في قدومي
من فضل منهو يكسي الريش للطير
تسمو بلاد العز في كل يومي
عساه من فضل الولي ينعم بخير
ويغفر له الرحمن منش الغيومي
محمد بن سعود يفرق عن الغير
يمشي على المنهج وطيب العلومي
زيزوم صامل قاد كل الطوابير
خلى بلاده في مصف النجومي
مع جيته حل السعد والتباشير
غاب القشر والشر صار امعدومي
يا دارنا جعلك على الدوم في خير
بأمر الإله اللي لوجهه نصومي..