ياكثر ماقلت ابا آسوي وابا آسوي ولا فيه شيء من اللي قلت سويته

كان بيت الاسبوع قد ارسله للصفحة الشاعر فنيدان الشلوي من الرياض للشاعر حمود البغيلي ويرغب طرحه في زاوية بيت وصدى والبيت يقول :
ياكثر ماقلت ابا آسوي وابا آسوي
ولا فيه شيء من اللي قلت سويته
وكان صدى البيت من الشعراء :
سنين مرت ونا كل وقتي أنوي
ابحث عن الحل دايم واثري اخطيته
اصل التردد مصيبة داخله جوي
واصبحت محرج بكل فعل لاقيته
على الرشيد - رياض الخبراء
كل ما قلت ابخلص انثني توي
وابحث عن انتاج لكن آنا ماريته
والله مدري بعمري ويش اناسوي
لابد للنوم من عيْنيّه اقصيته
محمد عبدالله الشهري - ابها
الفكر يضوي وانا شبيت له ضوي
واقول بكره اسوي شي ضويته
بالفكر والراي جوه راكب ٍ جوي
لكن لا اصبحت مابه شي بديته
مشعل بن صنت العصيمي- الخرج
كل البشر تضرب الأرض وتروي
وقليل منهم تعدى حده وبيته
ياليت منهو بعيدالشبح متقوي
في القول فعله وكل خابر صيته
حمد عبدالله الوايلي - حوطة سدير
حسب الأمل دايمٍ أقول ونوِّي
وحَال القدر دون ما بالامس نويته
لكن دام انني بالعمر توِّي
طول المدى القلب بالإيمان غذيته
وحتى ولو بعض وقتٍ ما صفى جوِّي
دربي بنهج الأمل والعزم ضوِّيته
سعود عائش التميمي الحربي - جدة