منظر عقابٍ بالسما فوقه اِعْقاب بين المودّه والصِّدف والخصومه

طيرٍ محلّق مع خويه وفرحان
فلّ الجناح وتابعه في مسيره
حيثه على الخوّة حريصٍ وشفقان
ارجي عن النكبات ربي يجيره
يطير بالعليا ولا طار له شان
يعطب طيورٍ في مخالب شطيره
علي الرشيد - رياض الخبراء
منظر عقابٍ بالسما فوقه اِعْقاب
بين المودّه والصِّدف والخصومه
من شافهم من طير بالرعب ينصاب
ويبحث عن المتقى ولا أحدٍ يلومه
والحرّ له بالقلب تقدير وإعجاب
يشرى ولو يزداد بالسوق سومه
والبر طيره والوطا فيه ما طاب
ومتاع قبل الوقت تبدا سمومه
سعود عائش الحربي - جدة
طيرين في جو السماء تكسر الحوم
فلّت جناحيها وهي طايره فوق
طارن على جون صحو ما به غيوم
لون الزراق ولونهن زايد الشوق
طيور جوارح تنتعش شافت لحوم
الكل منهم ينظر بصوت منطوق
صاحت صياح وبينها سر معلوم
سبحانه اللي رازقٍ كل مخلوق
حمد عبدالله الوايلي - حوطة سدير
الحباري كاثره عجّل علينا
خل عنك النوم والرحله سويّه
الأراضي مربعه لا تفوتك مشينا
الحباري بوسطها دايم مليّه
يا رفيقي انتبه لحدٍ يجينا
الذكاء مطلوب خل عينك قويه
محمد عبدالعزيز الخنيفر - أشيقر
طيورٍ تجوب الكون بالعرض والطول
بين السماء والأرض تدور فريسه
قبل طلوع الشمس هي تصول وتجول
تدوّر فريسه بالمخالب نحيسه
خالد ناصر المخيمر - روضة سدير
الطير يحمل وليفن لّه
حطّه على المتن وجناحه
عبر به أجواء الفضاء كلّه
من الصين ليا سودة الباحه
وإن شاف في رحلته خلّه
شاله.. وقفاه ملواحه
شجعان سعود العتيبي - الرياض
يعجبني الطير الذي في السما حام
من الطيور الجارحه له مخاليب
يبحث عن اللي يفترس بحث بالهام
والله يسهل للذي له مطاليب
يصيد فوق البر ولا الغمام
طير الحباري من جنابه معاطيب
محمد عبدالله الشهري - جبل اثرب
ابتدا جونا والقنص زان
برحلةٍ يا زينها وسط الربيع
وكل واحد مع رفيقه في أمان
واعرف الموقع حذاري لا نضيع
وننتقل يا صاحبي بأحسن مكان
ثم نتلاقى في موقع جميع
ريان محمد الخنيفر
نرحب بمشاركاتكم الشعرية وما تلتقطه عدساتكم
من الصور الهادفة والطريفة على إيميل الخزامى:
rb-khozama@alriyadh.com
صورة العدد (عدسة - محرر الزاوية)