ياما حلا كشتة هل الكيف والكار في واديٍ علّه ندى السيل واسقاه مكانهم رايق جمع شمس وأشجار مع وايتٍ معبا لربعه ومن جاه يا ليت من هو يمهم سلفح وطار واليا وصلهم حام وأدرج لملفاه جواً عليل وجمعة علوم وأشعار ومعلّقٍ معهم عشاهم بمرباه هرفي رضيع مربرب تقل جمار يأكل ويرضع يلحق أمّه وترعاه عبد الكريم النغيمشي - لوذة كشته على برّاد شاي .. ومعاميل ودلّه تسكن من شكى راسه صداع الجو صافي .. والسما فيه تشكيل سحبٍ تسر عيون للي بذا القاع الماء بوايت ما رووا فالبراميل ظنّي وراهم ذود إبل .. ومرباع جلسه على قاف الشِّعر والتعاليل الكل يروي ما سمع له من إبداع بارض نضيفه غاسلٍ سطحها السيل والدوحه الخضرا وصوفٍ لمن ضاع سعود عبدالعزيز الهزاع - نعام سبعة رجالٍ بالمواقف مناعير في جلسةٍ حلوة على شبّة النّار من حولهم وايت وخلفه مواطير طلعاتهم دايم تجي غب الأمطار لا قالوا الطلعة سمعنا التباشير العفش جاهز والأواليد حضّار علي الرشيد - رياض الخبراء الشجره اللي ظلها ضافي وزين الطول فارع والغصون الهجينه فيها خضار ونظرةٍ سرت العين ومكشاتها معروف وقته وحينه والمور واقف تحتها نعرفه وين قديم واضح من مديله سنينه يفرّغ الماء وانتثرماه في حين مدري يسقيها من الماي عينه ويبي يروي جذرها يوم يومين ولامن الأعطال وحمله يهينه حوله نشامى كلهم عزوة الدين في جو خالي مبعدين المدينه هذي حلاة العمر يا بعد غالين بالك تبالي بالظروف المتينه حمد عبدالله الوايلي - حوطة سدير الظل والماء .. والسعد .. والسروري في جلسةٍ يا زينها حول الأمطار كلٍ توفر ما نشوف القصوري لاصاروا ربوعك على الطيب حضّار فيها الهناء .. والعزّ وقت الحضوري في طلعةٍ فيها النشامى .. والأخيار بأرضٍ تسر القلب كثر الخيوري والحمد للمعبود علاّم الاسرار محمد عبدالعزيز الخنيفر - أشيقر نشوف العجب أشكال باخلاق بعض الناس يشيلون هم داخل صدورهم وتشين على شيِّ ما يسوى زعل ليهِ وَجْعَةْ رأس خطًا جاك من مخطي عنِه غضّ طرف العين ترى ما خذا الدنيا معَه من جمَعْ لَ لْماس قِبِرْ في ترابٍ مثلما يِقْبَر المسكين معَ خبرةٍ فيها من المرجله نوماس على الطيب والنخوه وحِسْن الشّيَم رابين تنحّر براري نجد يرحل خَوَى وِاعْماس كأنّك ملكت الكون بيْدينِكِ الثِّنْتِين تجلّا جميل الوصف والبسْط والإحساس بصورة رجالٍ في صفا البر مسرورين ناصر جمعان آل عوض - وادي الدواسر جلسة نشامى بالخلا عقب الأمطار وميٍ من الوايت على الأرض مسكوب ياما حلا مع راحة البال مسيار في صحصحٍ أخضر على البال مرغوب محدٍ وصل له كود من بالسما طار ونسايمٍ ما صدّها حايط الطوب وموترٍ ما همّه الرمل .. وغبار عقد الشّرا توّه قبل أمس مكتوب مع رفقةٍ قالوا ليا شرْتهم صار ودلال رسلانٍ بها الهيل مسكوب تحت السدر بالبر مقيال .. وستار برض الجمال وعشب مافيه عذروب سعود عائش الحربي - جدة جلسة نشامى همهم كيفت الراس في وسط قاعٍ ياخذ العقل شوفه والسدر ظل المور والربع جلاس والقلب ما عنده طواري تلوفه النفس مرتاحه بعيده عن النّاس طنخة وناسه والحياة مخلوفه لا باس يا قلب العنا ألف لا باس لا بد من يومٍ عيونك تشوفه خالد ناصر المخيمر - روضة سدير طلعه مع الاصحاب عز ونوماس رحله تسر القلب يا هي هنيّه مع شبّة النيران والربع جلاس فيها السوالف والعلوم الوفيّه يا زين جواً فيه بنٍ .. ومحماس وحولك نشامى نارهم دوم حيّه سولف مع ربوعك ولايجيك العماس ودير الشِّعر مع الرفاقه سويّه ريان بن محمد الخنيفر صورة العدد السابق
