هذا جمال الكون في وقت الاشراق يا زين شوفه مع زهور النواوير

منظر رهيب مصوّره حيل بارع
جاب الطبيعه كلها وسط صوره
شمس وغمام وطلحةٍ بس فارع
معها غديرٍ كمل الزين دوره
من زينها تعرض على كل بايع
وان سامها يا كود يدفع مهوره
مليون مع مليون تاصل ودايع
بحسابنا باكر وترسل بصوره
عبدالكريم النغيمشي - لوذة
يا مصور الصوره على حسن مالاق
ابدعت في الصوره وزين التصاوير
هذا جمال الكون في وقت الاشراق
يا زين شوفه مع زهور النواوير
مد النظر والجو صافي ألى راق
وأمتع هواك ثم سقها مشاوير
حمد عبدالله الوايلي - حوطة سدير
ياما حلاة الجو والسيل جاري
يا زين شوفه والعرب دوم تنصاه
والأرض مليانه بزين الخباري
الحمد للمعبود والخير شفناه
والسيل يجري من يمين ويساري
نعمه من الله ما تعدد عطاياه
وأيامنا هذي تزين الصحاري
عسى الربيع بشيّة الله يملاه
محمد عبدالعزيز الخنيفر- أشيقر
يا ليت توصف يا عوض وين ذا البر
ولا اللوكيشن ترسله بالموبايل
على الخزامى شاقني خوش منظر
الجو كايف ومن السماء شعيب سايل
لون الشفق عاكس على الرمل الاحمر
طبيعةٍ ما شفت زيه مثايل
وصف السماء كنه تحت شعر اشقر
ذهب على صدرٍ زهى بالجمايل
سعود عبدالعزيز الهزاع - نعام
منظر يشوق العين وقت الغروبي
لا صرت خالي البال والناس حولك
وش عاد لو طالت عليك الدروبي
ما به مسافه والعزايم فعولك
يا زينها لا صرت راعي القروبي
أنت المعزّب والمظافين جولك
خالد ناصر المخيمر - روضة سدير
منظر طبيعه يسلب اللب ويقول
سبحان خلاقٍ تفرّد بالإبداع
هب البراد وأصبح البر مشمول
بغيثٍ معه يزدان للبر مطلاع
هذا المكان اللي لدى النفس مقبول
مي وخضار والهوا فيه ذعذاع
وكن السما ما هو عن الأرض مفصول
في لقطةٍ أضفت تفاصيل وإمتاع
وصفا الغدير وكثر الشجر صار مدبول
من لقطة اللي بالتصاوير له باع
سعود عايش الحربي - جدة
أرضٍ تسر القلب والناس تاتيه
من كل صوبٍ عل يطلع ربيعه
وسالت أراضينا سيولٍ تغاطيه
عساه تنبت يا ربوعي سريعه
وعسى الزبيدي بارضها دوم ماليه
من يطلب المعبود بالخير يعطيه
ريان محمد الخنيفر
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
ويا هلا..
صورة العدد السابق