الصّبر

حالي تغيظ اعداي يابو مناحي
أقولها لك وانت من جاك قلّه
لو كل من يهتز لا اهتز طاحي
كان الشجر ما فيه عودٍ محلّه
سلّم مثل من جاء يسلّم وراحي
لا تنشد المفجوع عن ما حصلّه
الناس تسعى فالمساء والصباحي
والعصر كل يعجبه طول ظلّه
وبعض السوالف جد لو هي مزاحي
سوات من خامس رفيقه وتلّه
أنسى واعرّضها هبوب الرياحي
ماني وراء من زل طرّاد زلّه
هو ناحي عني .. وانا عنه ناحي
أدل ما يجهل .. وما أجهل يدلّه
ماهوب قد التجربه والنجاحي
أبعد عنه واليا ابتعد قلت خلّه
الصبر في بعض المواقف سلاحي
لا سل وقتي سيفه الصبر أسله
وصبرت لو الصبر سمٍ ذحاحي
وداويت به علّه على حساب علّه
ليت الخساره ريشةٍ من جناحي
مار الليالي حتت الريش كله
شِعر - خالد البقمي
Your browser does not support the video tag.