بعذر اللّي مع أيامه جلس يبكي على الأطلال

على الله يازمن بشكي جروحي والليال طْوال
عسى راعي العنا ينسى عناه وينشرح صدره
على الله يازمن بشْكي همومي والهموم جْبال
تعدّت عاصمة حزني حدود العالم بأسره
خساره بالسنين اللّي كتبتي سيرة الرحّال
فرحت أمسُ وْحزنت اليوم بس الخوف من بكره
لساني كم شكى صمته وإلى منّه حكى ما قال
طغى طبع السكوت بسيرة المحروم من صغره
سقى الله يوم كنت أضحك وبالي مستريح البال
ضحوكٍ ما عرفت الحزن وش معناه وش قَدره
وْكُبَرت وكَبْرَت أحلامي وصارت قصة الترحال
أماني في مهب الريح وحلمٍ ما اكتمل بدره
بَعَذر اللّي مع أيامه جلس يبكي على الأطلال
تذكّر ماضي أفراحه إلين خْنِقَته العبره
شعر - عبدالله بن عميرة
Your browser does not support the video tag.