ساعة الحاجة

على الله يازمن بشكي جروحي والليالي طوال
عسى راعي العنا ينسى عناه وينشرح صدره
على الله يا زمن بشكي همومي والهموم جبال
تعدّت عاصمة حزني حدود العالم بأسره
خساره يا السنين اللي كتبتي سيرة الرحال
فرحت أمس...وحزنت اليوم...بس الخوف من بكره
لساني كم شكى صمته..والى منّه حكى ما قال!
طغى طبع السكوت بسيرة المحروم من صغره
سقى الله يوم كنت أضحك وبالي مستريح البال!
ضحوكٍ ما عرفت الحزن وش معناه وش قدره؟
وكبرت وكبرت أحلامي وصارت قصة الترحال
أماني في مهب الريح وحلمٍ ما اكتمل بدره
عزيزه يا العيون اللي حضنتي دمعة الرجّال
حبستي دمعته بين المحاجر...يوم ضاع أمره
عزيزه يا الحروف اللي سكتي والكلام يقال
حكيتي...ما شكيتي الهمّ وهمّ القلب يا كبره
عزيزه يا اليدين اللي ثنيتك بأصعب الأحوال
أكفك ساعة الحاجة...وامدّك ساعة القدره ‍!
أنا منهو حمل همّه على راسه تقول عقال!
مجاديف الزمن دارت عليه ونَسّف الغتره!!
وأنا منهو فقد صوته وبعض الصوت به ما زال
دعيت الله يفرّجها عليّ...وبحَّت النبره
على الله ينجلي وقتٍ قضيته همٍ وغربال
ويشعّ النور في قلبٍ غشى ليل الظَلَم فجره.