ماخذني وقلبي على وين

يا شوق ماخذني وقلبي على وين
أشقيتني يا شوق وأبريت حالي
ولعتني في حب سِيد المزايين
ولا عاد بي للصبر زود احتمالي
فيه الجمال اللي خذا اللب والعين
كنه تخير في وصوف الجمالي
ورده على غصن بِخِضْر البساتين
تشرب من الينبوع ماءٍ زلالي
ينقص عن العشرين سِنه بعامين
عَنْهِ الهمومِ بْكِلِّ حالٍ تِشَالي
اسمه فلا زادت حروفه عن اثنين
ومعناه من حازه يعيش بْظلالي
ما اخلفت في حبه سلوم وقوانين
ولا حِدْتِ عن درب الوفا والحلالي
أهواه لَوّ أَنْطر على الحروهِ سْنين
من أجل وصله عندي المر حالي
لو كان في صدري مَعَ القلب قلبين
عشق الغضي يحتلهن احتلالي
ما يِنْغَسِل دينٍ إذا سِدّ بالدين
وش حيلتي والدمع هُوْ رأس مالي
أسهر طوال الليل والناس ممسين
وبضيقتي وبعبرتي ما يبالي
حكمه عَدِل إن كان وِدّه يقاضين
حتى ولو حكمه على الروح مالي
يا عزتي لَهْلِ الهوى والمحبين
إن كانِهم ذاقَوْ مِثِل ماجرا لي
عسى رجوعه ياملا قاب قوسين
ويْضمّه إحساسي ويرتاح بالي
وإن كان في لقياه ما عاد يمدين
فَنَا شهيد الترف حلْو الدلالي
إيْخِطِّ فوق القبر من فوق خطين
أسباب موت الخل فقده وصالي
Your browser does not support the video tag.