يا سايق السطحه ترفق على الهون على الحويّر لا تجيه المطبات

يا سايق السطحه ترفق على الهون
على الحويّر لا تجيه المطبات
يمكن يفك الحبل ماهوب مضمون
حتى ولوك رابطه عشر عقدات
لو جيت للتفتيش خلوك مرهون
حيثك مخالف مستحق الغرامات
سليمان عبدالعزيز السنيدي - الرياض
من صوب بالصورة طرافه ومن صوب
أحفظ نظامٍ بالمفيدات وافي
إن ما حصل يا ونش بالسوق مطلوب
مع القناعة ما عطا الرب كافي
نوبٍ تهب الريح في مكسب ونوب
محلى السلامه جنبها الستر ضافي
شيل الجمل لو العمل صار مضروب
أخير من عرفك من الجيب صافي
سعود عائش الحربي - جدة
يا راعي السطحه ترفق على الهون
حملك خفيف ومايجي فيه تكليف
وين الزباين لاحصل عطل يعطون
حملت الاوضح مايبي زود تعريف
مدري على سوقه وسومه يبيعون
تكرم يمين معشي الجار والضيف
وأبعد عن اللي دايم الدون في دون
مايعرف الجزله ولاشاف توصيف
حمد عبدالله الوايلي - حوطة سدير
يا عزتي له يوم شدّوه بحبال
من فوق سطحة سايقٍ ما رحمها
من عقب ماهي بالخلا تهذل هذال
شدوا قوايمها .. وشدوا نحرها
عبدالله مشعل الهويشان
يا راعي السطحه ترفق على الهون
هدّي من السرعه عليك الركاده
أرفق ترى ساهر مفتح لك عيون
ورجل المرور يريد منك الإفاده
لو طاحت البكره يا كيف تمشون
وصرت السبب ياهوه بهدم السعاده
خالد ناصر المخيمر - روضة سدير
يا ونش لا تسرع ترى الخط مخطور
فيه المخاطر وأنت راع السلامه
شوف الحويّر جالسٍ صار مقهور
ما يدري إن الليل قرّب ظلامه
بشائر القحطاني - الرياض
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
ويا هلا..
صورة العدد (عدسة الزميل بدر الفريدي)
Your browser does not support the video tag.