علوم الطبيعة

خالد البقمي
يشرح لي بزعمه علوم الطبيعه
وأنه يعرف السائل أثقل من الغاز
ويخلط مابين الفلسفه والشريعه
ويضيع مابين البلاغه والاعجاز
كلّش يعرفه غير سد الذريعه
يعد نفسه عد وانجازه انجاز
والشعر ملكه والقوافي تطيعه
ويقيّم الشعار ويحل الألغاز
وقصايده وقت السبق فالطليعه
لو كل بيت يرتكي فوق عكّاز
وما رخص سعره يرتفع لو يبيعه
واللي خسر لو يتّبع خطته فاز
والناس من عرعر الى أقصى الوديعه
مامنهم اللي مابعد جاه معتاز
ملّيت لكن رحمة الله سريعه
أن الجدار المعترض فيه تلفاز
قلت أرفعو بالصوت وش ذالمذيعه
أبيه يسكت والنظر عنه ينحاز
قال الجمال انا أتذّوق رفيعه
وكلٍ هداني وردٍ أحمر أبّرواز
قلت الجمال أن أرض ربي وسيعه
ننهض ونلقى أعقول ونفوسٍ أعزاز