أعزي آل حميد

قصيدة رثاء في أمير الفوج الرابع الشيخ نايف بن عبد المحسن بن حميد - رحمه الله -
البارحه جفني بعيدٍ عن النوم
يوم الأوادم رقدو طار نومي
سهران طوال الليل والقلب مهموم
أكايل العبره وأصارع همومي
مرحوم يا شيخٍ فقدناه مرحوم
عليه دمع العين غرق كمومي
شيخ يعدونه ليا عدو القوم
الطيب النادر قوي العزومي
نسل الشيوخ اللي لهم فعل ورسوم
قدام شيخان العبي والختومي
نايف ولد محسن ذرى كل مضيوم
حصنٍ يذري عن لهيب السمومي
أعزي العتبان في فقده اليوم
وأعزي أهل الفوج لما لمومي
وأعزي آل حميد في فقد زيزوم
يقوم بالواجب ويقضي اللزومي
يبكي على فرقاه من يعرفه دوم
والمجلس اللي فاتحٍ كل يومي
حرٍ إليا منه شهر يبعد الحوم
دايم على العليا عزومٍ جزومي
طلع حليف الجود هو والكرم توم
متحالفينٍ بالعمل والسلومي
عسى عوضنا فيه سادات ونجوم
إن غاب نجم في مكانه نجومي
أبناه وأخوانه بهم خير وقروم
الله يوفقهم خيار العلومي
يا الله عسى وجهه عن النار محروم
آمين يا ربٍ غفورٍ رحومي
وصلاة ربي عد من كمّل الصوم
على محمد عد وبل الغيومي