بديت بذكر الله عزيز الجلال
الواحد المعبود بخلقه رحومي
ورضيت بالأقدار في كل الأحوال
وما جاء على المعبود مقدر بيومي
العلم جانا مع كل مرسال
ولناس صارت تشيع العلومي
قالوا توفى أميرنا راع الأفعال
الكرم والطيب في كل يومي
أبوخالد معرّب الجد والخال
يمشي على الخير مشي القرومي
ماله طريق على القيل والقال
شيخ عن الزلات نفسه تشومي
للناس في مجلس الأمير مدهال
يلقون في (عليشة) شيخ عزومي
يرفع حجاجه على كل من سال
والجاه من عنده يقضي اللزومي
دنياه ما جت على دينار وريال
ولا همته حياة الرخا والحلومي
يا عين اذرفي الدمع همال
من فقدتك يامير كثرت همومي
يبكيك صغير ويبكيك رجّال
وتبكيك ناس بأقصى الحزومي
وتبكيك فيافي الأرض في كل جال
شرق وشام وفوق راس الخشومي
ويبكي عليك الطير وأنت رحّال
في مقنصك يازين ذيك العلومي
نصبر ورب الملا يغير الحال
وندعي لأبوخالد في كل يومي
يا الله عسى الجنة خير منزال
ويا رب عفوك علينا يدومي
ويجبر عزانا فيك ذربين الأفعال
خالد ومحمد للطيب فيهم وسومي
وبندر وسلطان نعم الرجال
العز ساسهم والفعل والسلومي
من لابة (المحمد) أصيلين وثقال
يا الله عسى عزّهم فينا يدومي
وختامها صلّوا عد ما هل همّال
على نبي الله شفيع رحومي