الحزن واحد

مرثية في الفقيد العم عبيدالله بن زيد الدلبحي -رحمه الله رحمة واسعة.
سبحان من عنده تصاريف الأحوال
ما يعجزه فالكون شي يريده
الواحد اللي عالم غيب الآجال
بأمره بدا خلقه وبأمره يعيده
حياتنا ما بين نازل ورحال
واللي رحل يبدا حياة جديدة
مرحوم يالشيخ البطل نسل الابطال
انا اشهد انه راح منا فقيده
كم واحد دمعه على الخد همال
دموع عينه عاصياتٍ عنيده
وكم واحد قلبه تحطم ولا زال
يرجف حزن بين الضلوع الجويده
على فقيد كان ملفى ومدهال
ريف اليتامى جعل روحه شهيده
يفزع مع اللي جاه بالجاه والمال
وله كلمة عند المواقف سديده
شهم شجاع وللصعيبات حلال
مرحوم ياراع الصفات الحميده
يا رب أجره من البلاوي والأهوال
يوم القيامه والأمور الأكيده
ويا لله عسى له جنة الخلد منزال
ويحيا الحياه الخالده والسعيده
ما بين حور عين وانهار وظلال
نطلبك من فضلك وخيرك تزيده
عمي عبيد الله كسب طيب الأفعال
بالطيب والمعروف زود رصيده
وزود على السمعه ترك عقبه رجال
مطلق ونايف فاللوازم عضيده
وحنا ترانا كل ابونا له عيال
الحزن واحد والمصيبه شديده
وصلاة ربي عد ماوادي سال
على النبي اللي دعى للعقيده
ضيف الله بن حمدان الدلبحي