فرزان

الشاعر محمد بن فرزان يرثي عمه : فرزان بن مسفر الفرزان .. «رحمه الله»
لو في يد الانسان يفدي له انسان
بالعسكري ماكان نوّمتك شهور
ولو ماهو مقدّر ويوم القضا حان
والله ما ادفن هامتك داخل السور
لكنّ هذي من تصاريف رحمٰن
وحنّا على امره بين منهي ومامور
صبحيّة الجمعة غدى جوّنا احزان
اظلم سمانا واصبح النور ديجور
برحيلكم يا عم يا عالي الشان
بانت كسيرتنا على طرّة النور
الحزن ساد وشرّع اليوم بيبان
وعيوننا عقب النظر صايره عور
مرحوم يا ركنٍ من .. ركون (فرزان)
ياللي بنيت .. لسيرتك مجد وقصور
تذكّروا مواقفك سر واعلان
سوالفٍ ما جاء بها زيف او زور
سوالفٍ متناقله بين ركبان
لو رحت يبقى باقي العلم ماثور
يا بو فرج لا يافرج كل عمسان
ياللي بفقدك ضاقت صدور وصدور
ليتك تشوف اللي اشوفه بالاعيان
واصواتنا اللي حشرجت داخل الزور
لو شفت ابوي ودمعه بخدّه امزان
وحزنٍ غشانا منّه القلب مخطور
لكنّ ربي حط بقلوبنا ايمان
نصبر ولا نجزع ولو يكبر الجور
نبقى على سيرتك لو كان ما كان
تموت روس وذكر الاجواد مذخور
ولا مات من خلّف وراه اربع اركان
على مسارك ما يخالف لهم شور
ذولا عيالك لي عضودٍ وذرعان
رغم الحزن آبشرك درع وجسور
حنّا وهم للعز في راس ما بان
على مسار اجدادنا نكمل الدور
وعساه يكتب لك من الرب غفران
مغفور ذنب .. بكل صفحة ومنشور
آمين يا منزل تبارك ولقمان
تكتب ل عمي جنّة الخلد والحور