كنز الصداقة

الصداقة رابط أقوى أحيانا من روابط النسب وتحدث عنها الشعراء في كل زمان.. والشاعر عبد العزيز المتعب يتحدث في هذه الأبيات عن الصداقة من منظوره الخاص فيقول:
الصداقة كنز باليوم العسير
وبالرخاء عز ومراجل بالحياه
وما يحقر الناس غير اللي حقير
غارقٍ ولا شماته في رداه
(شذرة السيف الذي حده شطير
ما يبيّنها سوى كفٍ قناه)
قبلنا قيل بجناحٍ ما يطير
طاير وباثنين كفّاخ بسماه
يا متطاول عمرك الفاني القصير
كم توفى شخص ما حقق مناه
ما ينام الليل والخاطر كسير
من تبيّن داه وبكفه دواه
إلزم اللّي وافيٍ عقله بصير
ورأيه الناهي بعيدٍ في مداه
خيّرٍ من رفقته يجيك خير
ولد حصنٍ ما تبدل به سواه
كان حظك ساعفك هو لك خشير
وكان حظك عاضبك تلقى وفاه
والخطأ لا جاء صغير من كبير
إدمحه بالريش لا تبحث خفاه
عش كثير تشوف بالدنيا كثير
ومن صبر ظفر وحقق مبتغاه
ومن نهل من سلسبيلٍ بالغدير
الثمايل عافها لو قل ماه
ومثل فرق البرد عن لفح الهجير
أو سواد الليل عن شمس بسناه
فرق صاحب عقب ربي لك نصير
عن صويحب ليت تسلم من غثاه