الأعزاء في صفحة مدارات هذه قصيدة جاءت كصدى لقصيدة الشاعر عبدالله مرزوق المرشدي التي نشرت في عدد (السبت 2 شعبان 1427ه العدد 12385) والتي يقول مطلعها: (الشعر لا خيل براسي خياله يسيل من وبل الجزيلات واديه) وقد قلت: بسم الذي كل الخلايق تساله الواحد المعبود ما خاب داعيه سجلت قاف في بيوته جزاله لفظه فصيحْ وواضحات معانيه الشعر له وقته وهذا مجاله وانا خيالي ما نضب سيل واديه هاضت شجوني والقلم طاب فاله يكتب على بيض الورق ساعة امليه يا من رثيت الشعر في ماجراله وتبغى العرب ترثي لحاله وترثيه رايك تشوف الناس راي بداله وكل على ما قيل رايه يقديه بعض الشعر قولك يفشل مقاله هذا كلام حق ماني بمخطيه لاشك بعض الشعر فخر وجماله يستانس اللي يستمع له وقاريه وانته تشوف الشين وابكتك حاله والزين جنبه وانت عينك تراعيه برق بعيد عنك مالك وماله يسيل غيمه وانت ما انت بشواحيه للزين زين يتبعه ويعنى له وللشين شين دوم يتبع محاريه واعرف ترى الكامل عزيز الجلاله كل ادمي لابد مالنقص غاشيه والشاعر اللي ما بقوله خماله ما هو بحقْ يدس شعره ويخفيه كانه عن الساحة تحيز لحاله يشوف المريض وقادر انه يداويه يعلن بشعره لين ياصل مناله حتى يزول الشين ويموت طاريه الشعر كل يستريح بظلاله ماهو فقط للشاعر اللي يسويه الناصح الداعي بموضوع قاله يستشهد ببيت للافهام يدنيه والعاشق اللي طيف خله طرى له يشبع به احساسه ويرسم مساعيه شيء يزيد الشعر مجد وشكاله كثير واهل الشعر قبلي دروا فيه هذا كلام الوايلي بامتثاله شعور شعر جعل صابت قوافيه ولاني بشيخ الشعر واول رجاله والنقد كن جاني بلا ميل راضيه وختامها لاهل الوفا والزماله سلام في صفحة مدارات نهديه
