يا قلب لا تحزن

واهني منهو جاهلٍ طبع الأيام
يجهل عناها جاهلٍ في غثاها
ما حار فكره في زمانه ولا حام
داخل فؤاده علةٍ كم خفاها
يا قلب لا تحزن على مر الأعوام
ولا يتعبك ماضي السنين وعناها
أنسى المصاعب وأجعل الفكر قدام
بد الليالي تسعدك في ضياها
خل الدموع وخل تفتيش الآلام
يمكن مع الأيام تلقى دواها
ولا لا يصيبك من عناء وقتك أحطام
أرض بنصيبك والحياة وقساها
ما أنت الوحيد اللي شكا ويل وأسقام
دنيا على غيرك تطاحن رحاها
ياكم منها حالٍ اليوم منضام
وياكم من عينٍ تزايد بكاها
وياكم فيها من مساكين وأيتام
ذاقو عناها ما اهتنو في حلاها!
وياكم فيها ضاعت أحلام وأحلام
مسكين ياللي عايشٍ في رجاها
وياقلب لا تحزن على مر الأعوام
ولا يتعبك ماضي السنين وعناها