سجل له التاريخ جوله وجوله

الصدر ضاقت به ضلوعه من أقصاه
والليل حملٍ يقتفيني بطوله
واليوم طرق القاف بانت خفاياه
وش الذي ينقال حتى نقوله
يا كثرها الحسره ويا كبرها الآه
والدمعة اللي سابقتني عجوله
رحل مليكٍ شامخٍ من عرفناه
عشنا على حبه سنين الطفوله
حتى تعلمنا الشموخ بمزاياه
وشلون كيف يكون معنى الرجوله
يا طول صبر اقلوبنا يوم فرقاه
نعيش وقفاته ونذكر فعوله
نذكر مواقف شامخة لا ذكرناه
يوم احتمت والحرب تقرع طبوله
من ضاقت الاريا وكلٍ يبس ماه
فزع أبو فيصل وهون حموله
نذكر له الوقفة ونذكر عطاياه
يرفا هل النكبة برفق وسهوله
ونذكره في هاك المشاعر وننعاه
وندعي عسى الجنات بآخر نزوله
أي والله اللي يا وطنا فقدناه
وسجل له التاريخ جوله وجوله
أي والله نذكره كيف ننساه
أي والله اللي حبنا له بطوله
يا مل قلباً ممحلاتٍ حناياه
وش الذي ينقال حتى نقول