شكوى

وياما على شانك حملت الثقيله
وأنت ولا أنت داريٍ بالبهاذيل
لين ان فكري ضاع منه دليله
أثرك لكيعٍ عايشٍ بالتماثيل
وهذي نهاية لعبتك والحصيله
لا واحسافه جلستي والتعاليل
لا واحسافة عنوتي يوم اجي له
زرعٍ زرعته ما طلع له محاصيل
مثل الذي يزرع بمجرى المسيله
واليوم ما يحتاج حل وتحاليل
وش لي بشخصٍ ما يرد الجميله
ما قلتها قصدي لرد المراسيل
واللي يبيله حق يفرش شليله
شكيت أنا حالي لسراجة الخيل
شقرٍ نهار الكون تسمع صهيله
قرمٍ إلى جيته بجال المعاميل
يفز بك والحمل عنك يشيله
ما شكى على راع الردى راعي الميل
ما يفتهم شكواي لو اشتكي له
سعود بن صحن بن شويه