السيل خلَّك حاذرٍ منه بالحيل من يقطعه واجب يراعي شروطه

راعي ونيت شاقه السيل محلاه
وعود على وقتٍ مضى يوم جيله
قام يتعبث قاطع السيل ممشاه
مخطي ولا عنده حساب ودليله
وان جار سيله راح فيها ولا امداه
يمكن يعرضها على اخطر وسيله
بعض المواقف ما لها حل ودواه
يبحل بعمره .. والمآسي حصيله
حمد عبدالله الوايلي - حوطة سدير
هذا خوي البر والبدو والسيل
بربيع فيه الناس والزمل مبسوطه
ونيت يعجب هاوي البر الجميل
وللخرايم تاكز الكل بجنوطه
البر جوِّه كايف الصبح والليل
ونسايمه في ريح الازهار مخلوطه
والسيل خلَّك حاذرٍ منه بالحيل
من يقطعه واجب يراعي شروطه
سعود عائش الحربي - جدة
يا راعي الدادسون ترفق شويّه
حذرا تغامر تقطع السيل كلّه
كم واحدٍ يروح من غير جيّه
قام ايتهقوى بين دقه.. وجلّه
اركب على الفكسار ما فيه زيّه
لا صرت رايق دق سلفه وتلّه
خليف فهيد الحربي - الرياص
ياللي على الددسن تبي فلة حجاج
وسط البراري في كل يوم تمشى
وين انت رايح والمطر كنّه أمواج
والناس بجال الوادي تقول لا تدشى
بعض العناد مسببٍ زود الاحراج
ياما نقلنا من الفقايد على النعشى
أحذر ترى الدنيا ماهي شبّة سراج
اما تغدى بك القدر والا تعشى
خالد ناصر المخيمر - روضة سدير
نرحب بمشاركاتكم الشِّعرية، وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com