ابن خشمان يردُّ على ابنه

نشرنا في عدد مضى قصيدةً للشاعر الشاب فواز بن غازي بن خشمان موجَّهةً إلى والده. وبالمناسبة والده من الشعراء المجيدين والمعروفين أيضاً وإن كان بعيداً عن الأضواء الإعلامية.
وقد وصلنا هذا الرد منه على قصيدة ابنه؛ حيث قال:
عسى الكريم اللي لبيته يحجون
يحماك يا فواز من سيرة العيب
ويبعد عن كل الفعول الشميته
ويحط ليدينك بحبله مقاضيب
سواك أبوك اللي بقولك عنيته
يرجي لي اللي يسمع الصوت ويجيب
شرحت صدري في كلام بديته
يا طيب المبدأ حصان الأطاليب
صدقني إني يوم كتبك قريته
فاضت دموعي فوق خدي سواريب
سمعت قولك بالسعد واحتريته
عسى رجايه يا بن خشمان ما يخيب
أنته اللي قلت الكلام احتميته
ما فيك يا فواز شكه ولا ريب
ما يخيَّب الله في ظن هقيته
وأنته حفيد مكملين المواجيب
ربعٍ لهم تاريخ.. ما هم نبيته
جنابهم يدله به الجار.. ومهيب
وأنت امش في منهاجك اللي بديته
تصير بعيون العرب ذيب يا ذيب
رافق رفيقٍ يرفع الراس صيته
وابعد عن اللي بالمصايب مصاويب
ترى الحياة بدون تقدير ميته
والقدر ساسه طيبات الاساليب
والبعد عن كل الفعول المقيته
بعبادة الخالق جزيل المواهيب
هذا كلام اللي بقولك شفيته
يا منظم جزل المعاني بترتيب
غازي بن خشمان الغرابي -الذيبية