مشاعر صادقة

لا ضاق صدري مشيت ورحت لنياقي
حيث ان قلبي يحب البر والنوقي
أوسع البال عند النوق لا ضاقي
لين اتريح ويهدا الدم بعروقي
وليا تريحت سقت القيل وانساقي
من هاجسٍ له على العدلات طاروقي
اتوق واخذ مع الطاروق دوراقي
واختار زين الكلام اللي على ذوقي
وامشي مع اللي اعزاز وشفهم راقي
لا بد يومٍ بغال الروح ملحوقي
هواية لي عليها القلب مشتاقي
دايم عليها يحن القلب ويتوقي
خوة نشاما صداها داخل أعماقي
تمكنت واستقرت جوف صندوقي
ربعٍ خذوا من سلفهم دين وأخلاقي
لاشك جار الزمان وجالهم عوقي
وقتٍ جمعنا طبايع غيبة افراقي
ياما شكا من صدوفه كل مخلوقي
لا بد عمر الفتى والموت متلاقي
وعقب الفضا منزلٍ بالارض مشقوقي
الكل هالك ووجه الله هو الباقي
من مات في رحمته والحي مرزوقي