عين الشوق

تنوم عيون خلق الله وعين الشوق سهرانه
تراقب طيف مجروح الهوى وتدوّر علومه
حبيبٍ تاهت دروبٍ تجيه وضاع عنوانه
وضاعت وجهة الغالي وطالت رحلة قدومه
لها باقي من الذكرى حياه وضحك حجانه
وملامح وجهه الخمري وبقايا ريحة هدومه
وسوالف ليله العذب وهمومٍ تسكن اعيانه
وشامة حسن في خده بقدرة رب مرسومه
ويدينٍ ترتعش خوف ورموشٍ حيل نعسانه
وقلبٍ ذاق صكّات الزمان وقويت عزومه
ولها باقي من الذكرى سوالف مزح وميانه
ومكان لا زعل واقفى ورقى في عالي رجومه
وشعرٍ ينظمه شوق ويعدّل مايل اوزانه
وكثرة هاجسٍ يطري عليه وكثرة حلومه
وحظٍ يخذله دايم يقوم وتهوي اركانه
ونفسٍ عن كثير الهرج محشومه ومعصومه
وكلمة حق يعلنها أبد ما تفارق لسانه
وعزة نفس صارت له من اطباعه من سلومه
وتنوم عيون خلق الله وعين الشوق سهرانه
تراقب طيف مجروح الهوى وتدّور علومه