آخر جروحي

كيف أبرّر غلطة القلب العطيب
كل ما صوّت له الحب استجاب
تشرق آماله وفي لحظة تغيب
مثل ظميانٍ يورّى له سراب
من طريق المهلكة دايم قريب
ولا أعلن من الحب والعشق انسحاب
ضاق بعيوني مدى الكون الرحيب
واختفى حلمي وسط ذاك الضباب
آخر جروحي من يدين الحبيب
اصدق الأحباب سوَّاها وغاب
ظن فيني ظن لا يمكن يصيب
والظنون أحيان نوع من العذاب
اتهمني واتهامه لي عجيب
كيف؟ ليه؟ شلون؟ ما عنده جواب
يحسب أن الجرح لا قفّى يطيب
ما شعر باحساس خفاقٍ مصاب
يا زمان المهزله وش بك تجيب
قسوة الأيام في عمر الشباب
مع جروح الحب والعود الرطيب
بي جروحٍ مالها عندي حساب
كانها قسمة فانا مالي نصيب
الذهب للغير وبكفي تراب
قلب يا قلبي تعلّم يا لبيب
من تجاريبك تألف لك كتاب
العذارى بعضهن له قلب ذيب
في ابتسامتها يعيش الفين ناب
انتبه يا قلب خلك مستريب
«لا سلام ولا كلام ولا عتاب»