ما تنفع الشكوى

ثاني نهار العيد جعله يعودي
يا مجاور الغالي ترى العلم ينصاك
شي حضرته ما يبي له شهودي
افزع لمضيوم من الضيم ينخاك
عينك تنام ولا يعرف الرقودي
ما تنفع الشكوى على غير شرواك
ولا يرتكي للورد غير العدودي
الرِّس ما يروي ضمايا رعاياك
والبيت ما يبني بليا عمودي
داي ودواي وعلتي من دناياك
انا دخيلك من شبيه العنودي
بنت الكحيلة ان عظا عج الارماك
تلحق ولا تلحق عليهن تزودي
فلوة عقيد صيرمي لا عدمناك
ضد الضديد وسقم عين الحسودي
ياليت ربي لدني عن مخاواك
من سبتك كثرت على اللهودي
الله يبيحك ما تسوى سواياك
استامنك واثرك لحتفي تقودي
خابرك تفرح بالمسير ليا جاك
وفرحتك بي حفرك جديد اللحودي
حسناك عندي ما تعادل خطاياك
لعل يوم جابني ما يعودي
سالم الغانم