حتى المقابر يجيها من ينبشها

الناس ما تترك المخلوق في حاله
خلك على منهجك والناس طنشها
لا صار لك منزلٍ بالطيب تسعى له
اعتش وخل الخلايق في معايشها
ما عاش من راقب العربان بأفعاله
يخطي على صافي أفكاره ويبلشها
ويتوه في مرقبٍ بالراي ما طاله
لأن المخاليق ما تترك نوايشها
ترمي حبال الخطا والنقص في جاله
لو كان عينه لهم بالورد فارشها
وتسرهم شوفته في حال يرثى له
حتى لو انفوسهم بالطيب ينعشها
هذا زمانٍ عجيب وزادت أهواله
حتى المقابر يجيها من ينبشها
- عايض أبوشيبه السبيعي