صوت الصورة

ياللي تهبّدك الجمل منت ملزوم
جنب عنه لا تعترض في طريقه
بنحورهِن وإغبارهِن طحت بهدوم
ورفيقك المذعور ياطا حريقه
يحوشهن جمعٍ كما حنشل القوم
هذا يصيح .. وذاك شرقٍ بريقه
فهد بن عقيل الطويان - بريدة
هذي الهجن هجت وجاتك مراويح
تسبق بنات الشوق لا فلت الريش
سابق خطى رجليك وأركض مع الريح
ورفيقك الله له يفكه من الجيش
فيصل بن سيف - الدلم
شاف الخطر ثم أطلق الرجل منحاش
والهجن هاجت والولد روعنه
عينه تراعي صاحبه كود.. لو عاش
مير البلا حدب الظهر يفجعنه
سعد الحماد - روضة سدير
خلّ الصبوح وعجّل إلحق مع الناس
لا يفوتنا وقت المزايَن وأنا أخوك
الوقت روّح وافهم الوقت حساس
انهض مع العربان لا يجي بك شكوك
محمد عبد العزيز الخنيفر - أشيقر
صورة عجيبه فيها شفت العجايب
ويش الذي جاب الصديق وصديقه
معرضين أنفوسهم للمصايب
ولاحان وقت الموت ماشي يعيقه
فواز بن سعود الحربي
البل خطر لاتعرض النفس للموت
الفوز ماينفعك بعد المماتي
ماينفع الانسان لافاته الفوت
خل السلامه لك من الموجباتي
لو صحت بعالي الصوت ماينفع الصوت
جاك الخطر من صوب كل الجهاتي
عقلا خزن العنزي - تبوك
هذي هي الأخطار يا ناس شوفوه
في سرعةٍ منحاش خايف توطاه
منهو سواته حق لازم تعذروه
البل قويه ماضي الوقت شفناه
سعد ناصر المسفر
الحق معك لو كنت خايف ومنحاش
خايف من البل تقتلك في دقيقه
والظاهر اللي بينهم مات .. ما عاش
واجب عن الأخطار يبعد رفيقه
بشائر القحطاني - الرياض
نستقبل مشاركاتكم على إيميل الخزامى :
rb-khozama@alriyadh.com
أو الفاكس رقم: 4871070
ونرحب بما تلتقطه عدساتكم
من الصور النادرة والطريفة
صورة العدد السابق