سيرة رجال

البارحه في وحدتي يوم الخلايق نايمين
النوم حارب يارفيقي موق عين اليعربي
ودارت تفاكيره على سيرة رجالٍ راحلين
تاريخ ماتمحيه عثرات الزمان اللولبي
شرْد المهار اللي تروّضهن فعول الصاملين
اشوفهن ذا اليوم يانايف غدنْ يحبنْ حبي
الشعر ميراث العرب ولسانهم في كل حين
قاموا عليه اليوم من بين البشر خبل وغبي
باعوا مفاريده ضحى وامسى لخلفاته حنين
مابين قصّاب القصيد وسوق جلّاب أجنبي
ضاعت مفاهيم الشعر وانحلّ جيل اللاحقين
ما عاد للشعر ثمره في سد وجهي وشنبي
والثانيه ياخوك جات بسفْك دم المسلمين
أعراضهم وأموالهم من بينهم تسبى سبي
اليوم شوف الشام تصرخ من يدين العابثين
شوف النّسا من حرّهن صاحن وقدّن العبي
وين العرب عن نصرة الإسلام وين الفاتحين
طلّي على الأجداد ياشمس الحقيقه واغربي
البارحه والشعر حوّلها على الطرق الحزين
ثارت براكين الشعور وفار دمْ اليعربي
- مخلد العزيزي