لك سنة!

ألا ياعيد كيف الحال وينك لك سنة ماجيت
نسيت انك مواعدني بفرحة تقتل احزاني
أنا مشتاق لك ياعيد وش علمك علي ابطيت
تراني منتظر والشوق يامرني وينهاني
انا ياعيد لو تدري صبرت وللأسف مليت
على رجوى وعدك العام صبري زاد واشقاني
تقول انك بترجع لي وتملى بالسرور البيت
وأشوفك جيتني ياعيد لكن جيت وحداني
حبيب الروح ما اشوفه ولا أدري وين به وليت
ترى لي عام ماشفته ولاجيته ولاجاني
تذكر يوم جيت العام كيف بشوفته فزيت
ولكن هالسنة وينه نساني أن تناساني
ألا ياعيد وش علمك مع أنك لك سنة ماجيت
كذا ياعيد وبسرعة تجي وتزود أحزاني