العمر

خمس وثلاثين مضت مثل ساعة
وهذا العمر مهما بنا طال مادام
ياسرع ما يقضي ويُطوَى اشراعه
مهماتعيش وتبني ابيوت واخيام
عمرك بها يوم وغرور متاعه
مَاحد بقى فيها سوى رب الانام
ولا احد عن امر الموت عند مناعه
يا قلب لا تغريك بقعا بالاوهام
والموت فيها ياخِذِك بانخداعه
لا تركن لدنياك واعمل لقدام
لا تنخدع لا شفت فيها وداعه
ترى الغني ما هوب من حقق احلام
ترى الغني من حب ربه وطاعه
اليا صار بيتك حفره وثوبك الخام
ابضيق اللحد حطوك عقب الوساعه
في يومه الموعود والعالم ازحام
يوم الحساب ويوم حصد الزراعه
لا صورة تنفع ولا حلو الاجسام
عند الولي ينفَعك نوع البضاعه
لابوك لاخالك ولا حتى الاعمام
مَاحد يفيد ولا تفيد الشجاعة
اسرع تدارك ما بقالك من ايام
ما دام درب الخير فاتح اذراعه
احرص على دينك مع اركان الإسلام
واوصيك لا تترك صلاة الجماعه
فجر وظهر وعصر والمغرب، الزام
ثم العشا فرض علينا اتباعه
ثم الزكاة الواجبة بَعدَه اصيام
والحج للي ياجد الاستطاعه
والخير كل الخير في وصل الارحام
لا شك ما هو في دروب القطاعه
يالله ياللي بالخفيات علام
يارازق اطيور الخلا مع اسباعه
تغفر لنا كل الخطايا والاثام
وتكتب لنا الجنة مع اهل الشفاعه
منصور بن عبدالله المجيدل
الرس