سيف المسافة

خالد الجبر

على غفلة قطع سيف المسافة من حياتك عام
وتشعل شمعة الحفلة وتطفي شمعة الحفلة
تبعثرك الدروب الواهية في زحمة الأيام
ولا تدري تماهل والعمر يمشي على مهله
تناهبك السنين.. ودفتر ايامك يجي قدام
تغانم جد وقتك لا يروح بسالفة هزلة
يابن آدم يخدرك الزمان ونشوة الاحلام
من اجلك لا يضيع اللي تعيش العمر من اجله
حياتك لا تخليها ضياع وثرثرة وهيام
ولا تغفل ترى طبع الزمن ياقف على غفلة
ولا تاطا مسافات العيون بشهوة الاقدام
ترى عنتر يخون الصمت لو ما خانته عبله
ظلام الذل لا يدخل جفونك والحياة آلام
ولا تنهان شب الطيب في وجه الردى واهله
حياتك لا غدت صفحة غموض ومستحيل ارقام
إلى سهلتها صعبة وإلى صعبتها سهلة
عن شموس الزمان ابن لْك في صحرا الحياة خيام
ولا تنسى فرات الوقت لعيون الظما ودجلة
تحزم بالشدايد خلها لك بالشديد حزام
بوقت ما يفيد اللي زها اصل الطيب طيب اصله
ترى اللي ما ترك له في ميادين الحياة زحام
يروح وما يجي له من على راس العلم شعلة
واذا غنت لك الدنيا نهار وطير حظك حام
على رحلة عمر فاغنم ترى كل العمر رحلة
هي الدنيا ياكم تحشم ذليل وكم تذل حشام
وياكم بعثرت شمل ادميٍ لملمت شمله
تبسم لك ولو قامت تبسم فالعيون سهام
ياخوفك كل ماقامت تبسم وش تبسم له
تتوه اقدام في ليل الطريق وتستنير اقدام
يعيش الجاهل بعلمه ويفنى العالم بجهله