صديقة أحلامي

اليوم ميلادك.. وميلاد الأحلام
يخضع له التاريخ غصب ويقف له
في مثل هذا اليوم من قبل كم عام
جيتي.. وجا للحب من ينتصف له
يالواقع اللي بعدك إن شفت الأوهام
وقفت في وجه الزمان اعترف له
إني كثر ماشفت من وقتي الألام
وكثر الدموع اللي بقت تنذرف له
ماكنت أحسب الحظ حتى ولو قام
يجيب لي مفتاح عمري وقفله
ويجيب وجهٍ كل ماجيت أنام
قمت ارسمه في دفتري واحلف له
إني ماحبيت الدفاتر والاقلام
إلا عشان آخط حرفك واقف له
صديقة أحلامي لو العمر مادام
لي الشرف عشته معك والشرف له
بكره اذا قالوا لك الناس كل عام
وأنتي بخير.. بتلمحيني بغفله
انا وقلبي.. بأول الصف قدام
نشعل لقلبك شمعته.. ونهتف له
لو سوو الحفلات لأعياد الأيام
انتي.. لكل أعياد الايام حفله
ولو تكبرين أعوام وأعوام وأعوام
في عيني وقلبي.. بتبقين طفله