القصيد يباع في كل دكان

ناصر السياري شاعر كبير ورجل كريم سلسل شعر ورجولة وكرم عاد ليهدينا الجديد الأجمل ويعدنا بالمزيد من نوادره الرائعه:
صار القصيد يباع في كل دكان
بالمكتبه والفرن هو والبقاله
من لوّن الصوره يقلّد لويحان
وما صار في باله من الهذر قاله
ليته قرا قصيد نمر بن عدوان
كوده يعرف البدع هو والجزاله
إليا جبرنا بخاطر فلان وفلان
ترى الشعر يموت موت الكلاله
الشعر هو شعر السديري وراكان
وشعر النصافي لي تنهّت وشاله
بين الصفوف يشيل زينات الألحان
لي صار مرشد عند صفه قباله
وابن شريم اللي يسمي سليمان
إلى ورد ما هيب تقصر حباله
راحوا بحور الشعر ذربين الأيمان
واليوم شعر القرن ذا ينرثاله
ضاع الشعر ما بين جاهل وفنان
وناس ٍ تصفق للغلط والفساله
ركبوا لهم خيل ٍ بلا سرج وعنان
خيل الغنم ما هيب خيل الخياله
ناصر بن محمد السياري الخالدي