مجاراة

بعد نشر قصيدة سلام في صفحة مدارات شعبية بتاريخ 14 محرم بالعدد 14316 أتت هذه المجاراة من الشاعر سعيّد محسن المطيري (أبو فهد):
يا من تعلّى رجم ٍ العام راقيه
قله هلا والصوت كلن درابه
يا داعي ٍ فكري على شان تكويه
ب أبيات فيها للمشقّى طرابه
أعزف وتر وأشرب نهر لين ترويه
والعب على المسحوب فوق الربابه
وقهو الخفوق اللي فقد من يقهويه
من بحْر شعر ٍ ميّزوك ب حسابه
ودامك بهد الطير دايم وتدعيه
سل الحدب لا تغمده في قرابه
وارسل بنات الفكر يمه تهدّيه
واعزف لها من سامريّك عتابه
شرهة غلا تمحى الجفا من تواليه
تحس فيه الود يوم الرضابه
الصاحب اللي له مودة تداريه
ما تواخذه في كل حكيٍ حكابه
وتلقاه في يومٍ تكشّف خوافيه
رجواه اخير امْن انقطاع الرجابه
وخلك كما نجم الثريا تباريه
اما تشوفه شوف والا سرابه
سعيّد محسن المطيري