كلٍ يشاف المكان اللي يناسب له

لا زلت انا الوارد اللي ما طوى حبله
على القراح الزلالي طال تردادي
اشرب واصدر ظما مدري وش اشرب له
يا من تغاربتي غيابي وهو عادي
بُعد الرجل عن دواعي ذله اهيب له
ما امشي قبل لا اعرف الوجهة بلا قادي
ولا اصلي الا وانا متقبل القبلة
منزالي النايفة عن حدري الوادي
ورجلٍ يجي في مسيل السيل يا هبله
أبعدت مالي غرض في ذل مقعادي
ما دام يلعب لي الذعذاع والعب له
ماني لعرفي مع هل العرف مترادي
لاشك كبدي من اللي شفت مندبلة
يا لاقية خير هاك العلم للغادي
اللي عجز يفرق الشيحة من الربلة
أمانتك بلغيه لكل حسادي
لا غارت الكدش وكحيلان باصطبله
أنا أول العشر ماني للعشر حادي
مالك ومال افتراض الجاهل الأبله
يموت انا حاسدي ما ياصل ابعادي
منّي نجوم السما لو يفهم اقرب له
ولابد ما الهايج المايج يجي هادي
وكلٍ يشاف المكان اللي يناسب له
إن مت مات النبي وآباي واجدادي
وما دام لي يومٍ ماني ميّتٍ قبله
عبدالرزاق الهذيل