حرف.. ونغم

القصيدة والأغنية ثنائي ثابت في تاريخ (الشعر والفن)، وهذه زاوية نقدم لأحبتنا ومتابعينا قراء (مدارات شعبية) من خلالها استجابة وتفاعلاً مع الرسائل التي ترد إلينا أجمل القصائد التي قدمتها أعذب الأصوات، وفي هذا العدد نقدم نصاً للشاعر الكبير الأمير بدر بن عبدالمحسن بصوت الفنان الرائع طلال مداح -رحمه الله-:
قلت المطر قالت من اليوم ديمه
مابه رعد لابرق ما غير هتّان
عشقٍ جمع ما بين قاعٍ وغيمه
سيّل على صدر الثرى دمع الأحزان
همس النديم اللي يعاتب نديمه
صوت المطر كنّه تعاتيب خلاّن
تبسّمت لجل الليالي القديمه
قالت تذكّر قلت يا بنت نسيان
نقض الجروح اللي تشافت ظليمه
لاعاد به وصلٍ ولا عاد هجران
مال الرجا في بعض الأحوال قيمه
وما للعمى صبحٍ ولو بات سهران
لو للزمن عن نيّة الغدر شيمه
ما فرّق أحبابٍ ولا بعّد أوطان
لا شك وينك يالقلوب السليمه
اللي تجازي عن خطا الخل غفران
كلٍ خصيم وذاق لوعة خصيمه
واللي خصيم الوقت يا بنت خسران