نهار بن ممدوح

بصمة

وماحدٍ فهمني وفي شعري قراني
ويوم اكتب الشعر لي غايات واهداف
ماهي تجارب وياعلّ وعساني
ولاهو على شان ينشر ثم ينشاف
أكتب معاناة نفسي يوم أعاني
يوم ألتفت والليالي سود وعجاف
واقرا تفاصيل عمري بالثواني
أقول راحت عليّه والعمر طاف
والوقت في صفحة كتابه طواني
الى متى والمسافه ظلم واجحاف
مدري من الناس وإلاّ من زماني
وكيف اطلب اللي جهلني بعض الإنصاف
وهو ماعرف كيف يقراني معاني
الشعر احبه واعشقه حيل واخاف
عليه لايهتدي درب الهواني
أبي حضوره يجي بإحساس شفاف
وابيه الاول ولا ارضى شي ثاني
مادامي اتنفّسه مافيني خلاف
ماهمني كل من راح ونساني
الناس من بينها عادات واعراف
وبيني وبينه اليا احتجته لقاني
أغيب لاشفت ماقدمت ماضاف
ولاحضورٍ ينزّل من مكاني
وأجي اليا شفت ليّه فيه ميقاف
واليا تغنيت به جبت السماني
أتعب ليا من لفاني حد الإسراف
وليا كتبني قصيدي ماعصاني
وان ماتباهيت به في كل مشراف
ماهوب شعري ولابصمة بناني
وان ما تحوّل كلام اعداي لهتاف
أحسن لي أسكت ولا اتعّب لساني