أجر الصوت

راع الهوى مجبور لا تعذلونه
من قال كيف الحال ماله ومالي
مثلي لزوم الناس ما ينشدونه
يدري بي الله ربي اعلم بحالي
ابا اطلبه دام البشر يطلبونه
عسى يرد اللي بحبه صفالي
وانا عطيته عهد والله مخونه
اللي ليامني سهرت وطرالي
اصبح موق العين تهمل مزونه
مانيب والله عقب فرقاه سالي
والله ولارضالي بمحبوب دونه
الله يا وقت منول مضالي
يوم الهوى يكبر وتثمر غصونه
عليه اجر الصوت مما جرالي
واجاوب الورقا الحمام بلحونه
خلي سلب عقلي بكسر الدلالي
اموت واحيا يوم ناظر عيونه
عز الله انه كان مثل الهوالي
ولا كنت متصور حياتي بدونه
اقفى وصار الحزن هو راس مالي
قلب العناء قامت تزايد اشطونه
راح الحبيب وحزني اللي بقالي
يضوي على قلبي تشيله اغبوبه
والله اليبطي بين الاضلاع غالي
عهد القضى ما دمت حي لصونه
ملفي حمود العتيبي
الداهنة