صداقتك

وكنت انوي اني اسري الليل كله
وفجأه ويبدالي من الليل بادي
كنه يقول الدرب يمناك دله
صداقتك ياليل صارت نكادي
صديق لكن في خباياك غله
صديق قدامي وصاحب مبادي
ولاغبت مسباح المغاليق فله
منك الغلط ولع فتيل الزنادي
وحطم صروحٍ بيننا مستضله
ياليل ماني عن فعايلك غادي
لكن طيبي يحتمل كل زله
أسمي الزلات عثرة جوادي
وتفوت لو كانت على القلب مله
كله على شان الغلا والودادي
وجسر المعزه ما نغيره محله
انا الوفاء عندي شرابي وزادي
ولي هامةٍ فوق النجوم المطله
انت تعرفني زين عرفٍ وكادي
اموت مشرب من غدير المذله
الوله قلنا خويك وعادي
والثانية زادة على الطين بله
والثالثه لوجت على غير قادي
ارجوك خذ كرت الصداقه وبله
والله للبسها ثياب الحدادي
وكلٍ على ماقيل دربه يدله
شعر/ نهار ممدوح