سيف الهجر

يكفي صبر.. اغفر لك الذنب وتزل
كل ما غفر اخطاءك تجيني بزله
نزّلت نفسي لك وقلبي تنزّل
واشوف نفسك بالكبر مسفهله
خل المهازل والدلع والتدلل
حس ف/بعض شوقي ولا أريد كله
لا تحسب إني طامع فيك منعل
لا تحدني سيف الهجر يوم اسله
تراي قادر اقطع الوصل وارحل
لا صار شوقي غاديٍ عن محله
شربت فنجالك غرابيل وعلل
وانا سقيتك من حناني بدله
واشوف نفسك بالتجاهل توغل
إن جيت لك طيب تجيني بعله
وإن جيت متواضع اشوفك تبدل
وإن صرت لك قاسي تجيني توله
(يا بنت صوني كبريائي عن الذل
ترى التواضع بالمحبة مذله)
والحب لا من صار أخذ وتبادل
والله ما تلقى أحد قال مله
فتّشت صفحاتي معك كلها غل
وقررت أنا بالحال حرق الجله
سؤال طبعك عندي اليوم له حل
وسؤال صدي صعب مثلك يحله
وش لي بساسٍ ما يجي منه لي ظل
كل على ما قيل دربه يدله
رجال أنا ما ارضى على نفسي الذل
وعيبٍ على شرواي يرضى المذله